டெல்லி : உதவிப் பேராசிரியர் பணிக்கான யுஜிசி – நெட் தேர்வுக்கு ஜனவரி மாதம் 17ந் தேதி வரை விண்ணப்பிக்கலாம் என்று பல்கலைக்கழக மானியக்குழு தலைவர் எம்.ஜெகதேஷ் குமார் தெரிவித்துள்ளார்.

பல்கலைக்கழக மானியக்குழுவின் யுஜிசி – நெட் தேர்வு என்பது தேசிய தேர்வு முகமையால் நடத்தப்படும் தகுதித் தேர்வாகும். இதில் தேர்ச்சி பெறுவதன் மூலம் தேசிய அளவிலான பல்கலைக்கழகங்களில் உதவிப்பேராசியர் பணிகள் மற்றும் ஆராய்ச்சி மாணவர் படிப்புகளுக்கு விண்ணப்பிக்க முடியும்.

இதுகுறித்து பல்கலைக்கழக மானியக்குழுத் தலைவர் தனது டிவிட்டர் பக்கத்தில் குறிப்பிட்டிருப்பதாவது, “இந்தியப் பல்கலைக்கழகங்களில் ஜூனியர் ரிசர்ச் பெலோஷிப் மற்றும் உதவிப் பேராசிரியர்களுக்கான யுஜிசி – நெட் தேர்வு வருகின்ற பிப்ரவரி மாதம் 21ந் தேதி முதல் மார்ச் மாதம் 10ந் தேதி வரை ஆன்லைன் வாயிலாக நடத்தப்படும். இந்த தேர்வுக்கு டிசம்பர் 29ந் தேதி முதல் அடுத்தாண்டு ஜனவரி 17ந் தேதி மாலை 05:00 மணி வரை விண்ணப்பிக்கலாம். கூடுதல் விவரங்களுக்கு ugcnet.nta.nic.in என்ற இணையதள முகவரியைத் தொடர்பு கொள்ளலாம்.”

இவ்வாறு அவர் தனது டிவிட்டர் பதிவில் தெரிவித்துள்ளார்.