தமிழகத்தில் மாநில பாடத்திட்டத்தின் கீழ் படிக்கும் மாணவர்களுக்கு அரசுத் தேர்வுகள் இயக்ககம் பத்தாம் வகுப்பு, பிளஸ் 1, பிளஸ் 2 வகுப்புகளுக்கான பொதுத் தேர்வுகளை நடத்தி வருகிறது. இதுதவிர இவ்வியக்ககம் கல்வி சார்ந்த தேர்வுகளான தனித்தேர்வர்களுக்கான எட்டாம் வகுப்புத் தேர்வு மற்றும் தொடக்கக் கல்வி பட்டயத் தேர்வு (முதலாம் ஆண்டு / இரண்டாம் ஆண்டு) களையும்,உதவித் தொகைக்கான தேர்வுகளான தேசிய திறனாய்வுத் தேர்வு (NTSE),தேசிய வருவாய் வழி மற்றும் தகுதி படிப்பு உதவித் தொகை தேர்வு (NMMS),தமிழ்நாடு ஊரக மாணவர்கள் திறனாய்வுத் தேர்வு (TRUST)களையும் நடத்தி வருகிறது.

அந்தவகையில் நடப்பு கல்வி ஆண்டுக்கான பொதுத்தேர்வு பட்டியலை சென்னை, தலைமைச் செயலகத்தில் பள்ளிக் கல்வித் துறை அமைச்சர் அன்பில் மகேஷ் பொய்யாமொழி இன்று அறிவித்தார்.

பின்னர் அவர் செய்தியாளர்களிடம் தெரிவித்ததாவது,

“தமிழகத்தில் 2022-2023 கல்வி ஆண்டிற்கான பத்தாம் வகுப்பு, பிளஸ் 1, பிளஸ் 2 பொதுத்தேர்வுகள் அடுத்த ஆண்டு (2023) மார்ச் மற்றும் ஏப்ரல் மாதங்களில் நடக்கிறது.

பத்தாம் வகுப்பு பொதுத்தேர்வு ஏப்ரல் 6ந் தேதி தொடங்கி 20ந் தேதி வரையும், பிளஸ் 1 பொதுத்தேர்வு மார்ச் 14ந் தேதி தொடங்கி ஏப்ரல் 5ந் தேதி வரையும், பிளஸ் 2 பொதுத்தேர்வு மார்ச் 13ந் தேதி தொடங்கி ஏப்ரல் 3ந் தேதி வரையும் நடக்கிறது.