ஜோதிடம் என்பது கணித சாஸ்திரம். 12 ராசிகளையும், ஒன்பது கிரகங்களையும் வைத்து கணக்கிடப்படுவதுதான் ஜோதிடம்.

ஒரு மனிதருக்கு உடல்நிலை பாதிக்கப்படும்போது அவர் மருத்துவரிடம் சென்று உடலில் உள்ள கோளாறுகளை தெரிந்து கொள்வதுபோல், ஒரு மனிதருக்கு வாழ்க்கையில் சங்கடங்கள் உண்டாகும்போது ஜோதிடர்களிடம் சென்று அதற்குரிய காரணத்தை தெரிந்து கொள்ள முடியும்.

மருத்துவம் என்பது உடலுக்குரியது. ஜோதிடம் என்பது வாழ்க்கைக்குரியது.

இந்த இடத்தில் ஒரு முக்கியமான தகவல்… இன்று ஜோதிடர்கள் என்று சொல்லிக் கொள்பவர்கள் நிறைய பேர் இருக்கின்றார்கள். அதில் ஒவ்வொருவரும் ஒவ்வொரு பாணியைக் கடைபிடித்து வருகின்றார்கள். யார் திறமையானவர்? யார் திறமையற்றவர்? என்பதை முடிவு செய்யவேண்டிய இடத்தில் இருப்பவர்கள் ஜோதிடம் பார்ப்பவர்கள்தான்.

இன்று… ஐந்து ரூபாயில் தொடங்கி ஐயாயிரம் ரூபாய் வரையில் ஜோதிடர்கள் தங்களுக்குரிய கட்டணமாக வசூலித்துக் கொண்டிருக்கின்றார்கள். அவர்கள் எல்லோரிடமும் அவரவர் நிலைக்கேற்ப, விருப்பத்திற்கேற்ப ஜோதிடம் பார்க்க சென்று கொண்டுதான் இருக்கின்றார்கள்.

எனக்குத் தெரிந்து ஒருவர், ஜோதிடம் பார்ப்பவர்… பெரும்பாலும் அவர் முகூர்த்தங்கள்தான் குறித்து கொடுப்பார். அவர் முகூர்த்தம் குறித்துக் கொடுத்த நாளில் சந்திராஷ்டமம் இருந்த ஜாதகர்கள்கூட உண்டு.

அவரைப் பொருத்தவரை பஞ்சாங்கத்தில் உள்ள முகூர்த்த நாட்களெல்லாம் முகூர்த்த நாட்கள்தான்.

அதேபோல், திருமணப் பொருத்தமா? 8 பொருத்தம் இருக்கு. 9 பொருத்தம் இருக்கு. பேஷா இருக்கு… நன்னா இருக்கு… என்ற பதில்தான்.

பெண்ணுடைய ராசி என்ன? பையனுடைய ராசி என்ன? பெண்ணுடைய லக்கினம் என்ன? பையனுடைய லக்கினம் என்ன? இருவருக்கும் 2, 4, 7, 8, 12ல் உள்ள கிரகங்கள் யார்? அவர்களின் நிலை என்ன? களத்திரக்காரகன், களத்திரஸ்தானாதிபதி நிலை என்ன? 11ஆம் இட அதிபதி யார்? அவருடைய நிலை என்ன? என்பதையெல்லாம் அவர் பார்த்ததில்லை.

பொதுவாக ஒருவர் மீது நம்பிக்கை வந்துவிட்டால் அவர் சொல்வதுதான் இங்கே வேதவாக்காக இருக்கிறது.

இந்த இடத்தில் மிக முக்கியமான ஒரு தகவல் என்னவென்றால், பலர் என்னிடம் கேட்கின்ற கேள்வி… நான் அனுஷம் நட்சத்திரம் விருச்சிக ராசி, நான் சதய நட்சத்திரம் கும்ப ராசி, நான் மக நட்சத்திரம் சிம்ம ராசி இதற்கு எனக்கு என்ன பலன் என்பதுதான்.

முதலில் இவர்கள் அனைவரும் தெரிந்துகொள்ள வேண்டிய ஒரே ஒரு தகவல். ஒரு நட்சத்திரத்தை வைத்து, ஒரு ராசியை வைத்து யாரும் அவர்களுக்குரிய பலன்களை தெரிந்து கொள்ளவும் முடியாது. கூறி விடவும் முடியாது.

இதை ஒவ்வொருவரும் புரிந்து கொள்ள வேண்டும். அப்படிப் பலன்களை தெரிந்து கொள்ள முடியும் என்றால் நாளிதழ்களில் நாள் பலன் வருகிறது. தொலைக்காட்சிகளில் ஜோதிடர்கள் நாள்தோறும் ஒவ்வொரு ராசிக்குரிய பலன்களை சொல்லிக் கொண்டிருக்கின்றார்கள். அவற்றின் வழியாகவே ஒவ்வொருவரும் அவர்களுக்குரிய பலன்களை தெரிந்து கொள்ளலாமே.

ஆனால், ஜோதிடம் என்று வருகின்றபோது ஒருவருடைய பிறப்பு ஜாதகத்தை வைத்து, அந்த ஜாதகத்தில் ஒன்பது கிரகங்களும் சஞ்சரிக்கின்ற நிலையை வைத்து, எந்த கிரகம் பகையாக, எந்த கிரகம் நீச்சமாக, எந்த கிரகம் உச்சமாக, எந்த கிரகம் நட்பாக சஞ்சரிக்கின்றார்கள்? ராசி என்ன? லக்கினம் என்ன? நட்சத்திரம் என்ன? என்ன திசா புத்தி தொடங்கி இருக்கிறது? இப்பொழுது எந்த திசா புத்தி நடந்து கொண்டிருக்கிறது? அவர்கள் யாருடைய சாரத்தில் உள்ளனர்? நட்சத்திர நாதன் எந்த நிலையில் இருக்கின்றார்? ராசிநாதன் எந்த நிலையில் இருக்கின்றார்? லக்கினாதிபதி எப்படி இருக்கின்றார்? திசாநாதன் எப்படி இருக்கின்றார்? புத்திநாதன் எப்படி இருக்கின்றார்? ஒவ்வொரு காரகத்திற்கும் உரிய கிரகங்கள் எப்படி சஞ்சரித்துக் கொண்டிருக்கின்றார்கள்? எந்த நிலையில் சஞ்சரிக்கின்றார்கள்? என்பதையெல்லாம் முழுமையாக தெரிந்தால்தான் ஒருவருக்கு யாராலும் முழுமையான பலன்களை சொல்ல முடியும். இதை ஒவ்வொருவரும் உணர வேண்டும்.

நீங்கள் யாரிடம் வேண்டுமென்றாலும் போய் ஜாதகம் பாருங்கள். ஆனால் எந்த ஒருவரிடமும் என்னுடைய நட்சத்திரம் இது. என்னுடைய ராசி இது. இதற்குரிய பலன் என்ன என்று கேட்காதீர்கள். அப்படி கேட்பது உங்களை நீங்களே ஏமாற்றிக் கொள்வதாகவே இருக்கும்.

நான் எல்லோருக்கும் சொல்வது ஒரே ஒரு தகவல்தான். உங்களுக்கு விருப்பமான ஜோதிடர் எங்கிருந்தாலும் அவரிடம் சென்று உங்கள் ஜாதகத்தைக் கொடுத்து உங்களுடைய பலன்களை தெரிந்து கொள்ளுங்கள். ஜோதிடம் என்பது கடல் போன்றது. இங்கே தெரிந்து கொள்வதற்கு நிறையவே தகவல்கள் இருக்கிறது. முழுமையாக தெரிந்தவர்கள் என்று இதுவரை ஒருவரையும் நானும் பார்க்கவில்லை. நானும் இல்லை.

இங்கே ஜோதிடர்கள்கூட நிறைய கற்றுக்கொள்ள வேண்டும். கற்றுக்கொண்டே இருக்க வேண்டும். அவற்றின் வழியில் தம்மை நம்பி வருகிறவர்களுக்கு பலன் சொல்ல வேண்டும்.

அந்த அளவிற்கு ஜோதிட சாஸ்திரம் பல அறிய தகவல்களை தன்னிடம் புதைந்து வைத்துக் கொண்டுள்ளது.

எனவே, ஜோதிடம் பார்க்க விரும்புகிறவர்கள் தங்களுக்குரிய பலன்களைத் தெரிந்து கொள்ள விரும்புகிறவர்கள் உங்களுடைய ஜாதகத்தை ஜோதிடர்களிடம் கொடுத்து பலன்களைத் தெரிந்து கொள்ளுங்கள்.

ஜோதிட வித்தகர் திருக்கோவிலூர் பரணிதரன், 9444 393 717.