‘நேர்கொண்ட பார்வை’, ‘வலிமை’ படங்களை அடுத்து மீண்டும் நடிகர் அஜீத், டைரக்டர் ஹெச்.வினோத், தயாரிப்பாளர் போனி கபூர் கூட்டணி ‘துணிவு’ படத்தில் கைகோர்த்துள்ளது.

அஜீத்தின் 61வது படமான இதில் நடிகை மஞ்சு வாரியர், சமுத்திரக்கனி, மகாநதி ஷங்கர் ஆகியோர் நடித்திருக்கிறார்கள்.

ஜிப்ரான் இசையமைத்துள்ள இப்படம் பொங்கல் திருநாளை முன்னிட்டு வரும் ஜனவரி மாதம் 12ந் தேதி ரிலீசாக உள்ளது.

‘துணிவு’ படத்தை தமிழ்நாட்டில் உதயநிதி ஸ்டாலினின் ரெட் ஜெயன்ட் மூவீஸும், வெளிநாடுகளில் சுபாஸ்கரனின் லைக்கா நிறுவனமும் வெளியிட உள்ளது.

‘துணிவு’ படத்தின் அப்டேட் இன்று வெளியாகும் என படக்குழு ஏற்கனவே அறிவித்தபடி, இன்று காலை முதல் இரவு வரை படத்தின் கேரக்டர்களை ஒவ்வொன்றாக அறிமுகப்படுத்த இருக்கிறார்கள்.

‘மைப்பா’ என்ற கேரக்டரில் பிரபல பட்டிமன்ற பேச்சாளர் மோகனசுந்தரமும், ‘ராஜேஷ்’ என்ற கேரக்டரில் நடிகர் பக்ஸும், நடிகர் பிரேம், ‘பிரேம்’ என்ற கேரக்டரிலும், ‘க்ரிஷ்’ என்ற கேரக்டரில் நடிகர் ஜான் கொக்கனும், ‘ராதா’ என்ற கேரக்டரில் நடிகர் வீராவும், ‘முத்தழகன்’ என்ற கேரக்டரில் நடிகர் ஜி.எம்.சுந்தரும், ‘ராமச்சந்திரன்’ என்ற கேரக்டரில் நடிகர் அஜய்யும், ‘தயாளன்’ என்ற கேரக்டரில் நடிகர் சமுத்திரக்கனி கேரக்டரும் இதுவரை ஒன்றன் பின் ஒன்றாக வெளியாகி உள்ளது.

இறுதியாக தமிழ்த் திரை ரசிகர்கள் ஆவலுடன் எதிர்பார்த்து காத்திருக்கும் நடிகர் அஜீத்தின் கேரக்டர் அறிமுகம் இருக்கும் என படக்குழு தெரிவித்துள்ளது.