நடிகர் அஜீத், டைரக்டர் ஹெச்.வினோத், தயாரிப்பாளர் போனி கபூர்  ஆகியோர் ‘நேர்கொண்ட பார்வை’, ‘வலிமை’ படங்களைத் தொடர்ந்து மூன்றாவது முறையாக கைகோர்த்துள்ள திரைப்படம் ‘துணிவு‘.

பஞ்சாபில் நடக்கும் வங்கிக் கொள்ளையை மையமாக வைத்து படமாக்கப்பட்டுள்ள ‘துணிவு’ படத்தின் ட்ரெய்லர் இன்று மாலை 7 மணிக்கு வெளியாகும் என ஜீ ஸ்டுடியோ அறிவித்துள்ளது, அஜீத்தின் ரசிகர்கள் மத்தியில் மிகப்பெரிய எதிர்பார்ப்பை ஏற்படுத்தியுள்ளது.

சமூக வலைதளப் பக்கங்களில் ‘துணிவு’ ஹேஷ்டேக் இந்திய அளவில் ட்ரெண்டாகி முதலிடத்தை கைப்பற்றியுள்ளது.

முன்னதாக நேற்று, ‘துணிவு’ படத்தின் கேரக்டர்களை ஒன்றன் பின் ஒன்றாக படக்குழு அறிமுகப்படுத்தியது.

பத்திரிகையாளர் ‘மைபா’ கேரக்டரில் பட்டிமன்ற பேச்சாளர் மோகன சுந்தரமும், நடிகர் பிரேம் தனது சொந்த பெயரிலேயும், ‘ராஜேஷ்’ என்ற கேரக்டரில் நடிகர் பக்ஸூம், ‘க்ரிஷ்’ என்ற கேரக்டரில் நடிகர் ஜான் கொக்கனும், ‘ராதா’ என்ற கேரக்டரில் நடிகர் வீராவும், ‘முத்தழகன்’ என்ற கேரக்டரில் ஜி.எம்.சுந்தரும், ‘ராமச்சந்திரன்’ என்ற கேரக்டரில் நடிகர் அஜய்யும், ‘தயாளன்’ என்ற கேரக்டரில் பிரபல டைரக்டரும், நடிகருமான சமுத்திரக்கனி காவல் அதிகாரி வேடத்திலும், நடிகை மஞ்சுவாரியர் கண்மணியாகவும் நடித்துள்ளனர்.

இதனைத் தொடர்ந்து  அஜீத்தின் படத்தை வெளியிட்டு, அவரது பெயர் என்ன என்று யூகித்து சொல்லுங்கள் என தயாரிப்பு நிறுவனம் ரசிகர்களை கேட்டுக்கொண்டதை அடுத்து, அவரது ரசிகர்கள் ஏகே, விநாயக் மகாதேவ்,  தூக்குத்துரை.. உள்ளிட்ட பல்வேறு பெயர்களை பதிவிட்டு வருகின்றனர்.

அதேசமயத்தில், டிரெய்லர் அப்டேட் வெளியானதில் இருந்தே சமூக வலைதளப் பக்கங்களில் இதுகுறித்த எதிர்பார்ப்பும் எகிறியுள்ளது.

பரபரப்புக்கு பஞ்சம் இல்லாத ஆக்சன் த்ரில்லர் படமாக உருவாகியுள்ள ‘துணிவு’ படத்தின் ட்ரெய்லர் இன்று மாலை 7 மணிக்கு வெளியாகிறது.