சேலம் மாவட்டத்தில் அமைந்துள்ள மேட்டூர் அணை கிட்டத்தட்ட 80 ஆண்டுகளுக்கும் மேலாக காவிரி டெல்டாவின் முக்கிய பாசன ஆதாரமாக விளங்கி வருகிறது. பல மாவட்டங்களின் குடிநீர் தாகத்தையும் தீர்த்து வைத்து வருகிறது. கர்நாடகாவில் இருந்து வரும் நீர்தான், மேட்டூர் அணையை நிரப்புகிறது.

ஆனால், கர்நாடகா காவிரியில் தண்ணீர் திறந்துவிட அடம் பிடித்து வருகிறது. இதனால் மேட்டூர் அணை நீர்மட்டம் கடந்த ஆண்டு 30 அடியாக சரிய, காவிரி டெல்டாவுக்கு நீர் திறப்பு முற்றிலும் நிறுத்தப்பட்டது. இதனால் சம்பா, குறுவை சாகுபடிகள் கடுமையாக பாதிக்கப்பட்டதோடு, விளைச்சல் குறைந்தது.

நடப்பு ஆண்டில் கூட கர்நாடகாவுக்கு தண்ணீர் திறக்க மனமில்லை. ஆனால், காவிரி நீர் பிடிப்பு பகுதிகளில் பெய்த கனமழை ஒட்டுமொத்த சூழலையும் திருப்பிப்போட்டது. கர்நாடகாவில் உள்ள அணைகள் அனைத்தும் நிரம்பிய நிலையில், இதற்கு மேல் தண்ணீரை தேக்க முடியாது என உணர்ந்த அம்மாநில அரசு, உபரி நீர் முழுவதையும் தமிழகத்திற்கு திறந்தது.

அதுவரை 40 அடியாக இருந்த மேட்டூர் அணை நீர்மட்டம், கர்நாடகம் திறந்துவிட்ட தண்ணீரால் சில வாரங்களில் முழுக் கொள்ளளவை எட்டியது. இதனால் காவிரி டெல்டாவின் பாசனத்திற்கும் தண்ணீர் திறந்துவிடப்பட்டு வருகிறது. இந்த தண்ணீரானது காவிரி டெல்டாவின் கடைமடைப் பகுதிகளுக்கு சென்று சேர்ந்தது.

இந்த நிலையில் மேட்டூர் அணை நீர்மட்டம் சற்று குறைந்து 117.90 அடியாக உள்ளது. அணையில் உள்ள நீர் இருப்பும் 90.15 டிஎம்சியாக குறைந்துள்ளது. மேட்டூர் அணைக்கு வரும் தண்ணீரின் அளவு 4284 கன அடியாக சரிந்துள்ளது. அதே சமயம் அணையில் இருந்து சுமார் 12,000 கன அடி தண்ணீர் காவிரி ஆற்றில் திறந்துவிடப்பட்டு வருகிறது.

மேட்டூர் அணை நிரம்பியதால் காவிரி டெல்டாவில் உள்ள விவசாயிகள் சம்பா சாகுபடி பணிகளை தொடங்கிவிட்டனர். காவிரியில் தண்ணீர் வரத்து சீராக இருந்தால் மட்டுமே, சம்பா சாகுபடி சிறப்பாக நடைபெறும். அடுத்த மாதம் நடவுப் பணிகள் தொடங்க உள்ள நிலையில், கர்நாடகா கூடுதல் தண்ணீர் திறக்க தமிழக அரசு அழுத்தம் தர வேண்டும் என விவசாயிகள் வலியுறுத்தியுள்ளனர்.