தொல்காப்பியம், ஏனோ பள்ளிகளிலும், கல்லுரிகளில் விரிவாகப் போதிக்கப்படுவதில்லை அது ஒரு இலக்கண நூலாகவேபெரும்பாலோரால் கருதப்படுகிறது. உண்மையில் தொல் தமிழரின் வாழ்வியியல் செய்திகள் பல தொல்காப்பியத்தில் உள்ளது. தொல்காப்பியப் பொருளதிகாரமே தமிழரின் வாழ்க்கைநிலைகள் பற்றியும், சமுதாயம் பற்றியும் பெரும்பகுதி பேசுவதாக அமைந்துள்ளது. 

தொல்காப்பியத்தின் எழுத்ததிகாரம், சொல்லதிகாரம் நூற்பாக்களை விட எண்ணிக்கையிலும் அடி அளவிலும் பொருளதிகார நூற்பாக்களே அதிகமாக அமைந்துள்ளன. அக்காலச் சமுதாயத்திற்கு தொல்காப்பியம் கொடுத்த முக்கியத்துவத்தினையும், உலக அளவில் எழுத்துக்கும், சொல்லுக்கும், யாப்பிற்கும், அணிக்கும் மட்டுமே ஏனைய மொழி நூல்கள் இலக்கணம் வகுத்திருக்கின்ற நிலையில், தனித்தன்மையுடன் பொருளதிகாரத்தின் வாயிலாக பழந்தமிழரின் சமுதாய வாழ்விற்கு இலக்கணம் வகுத்துக் கொடுத்த மொழி தமிழே என பெருமை கொள்ளச் செய்கிறது.