விகடன் விருதுகள் 2022
சிறந்த வெப்சீரிஸ் – ‘விலங்கு’
தமிழின் முழுமுதல் வெகுஜன வெப்சீரிஸ். த்ரில்லரில் ஆங்காங்கே காமெடி தூவி சுடச்சுட தீயிலிட்டு வார்த்தெடுத்தபோது புடமிட்ட தங்கமாய் வெளிப்பட்டது ‘விலங்கு.’ தமிழ் ஓ.டி.டி வெளியின் வெற்றிக் கையேடு ‘விலங்கு’!
சிறந்த அனிமேஷன் விஷுவல் எஃபெக்ட்ஸ் – ‘NY VFXWAALA’ (பொன்னியின் செல்வன்-1)
‘பொன்னியின் செல்வன்’ படத்தில் கணக்கற்ற மாயாஜாலங்கள் நிகழ்த்திய இந்தத் தொழில்நுட்பக் குழுவை அங்கீகரிப்பதில் பெருமகிழ்ச்சி அடைகிறது ஆனந்த விகடன்!
சிறந்த ஆடை வடிவமைப்பு – ‘ஏகா லக்கானி’ (பொன்னியின் செல்வன்-1)
வரலாற்றுப் புதினங்களில் வரும் மனிதர்களை அப்படியே திரையில் வார்ப்பதில் இருக்கும் சவால்கள் எக்கச்சக்கம். ஆனால் அதைத் தனக்கே உரிய பக்குவத்தோடு கையாண்டிருந்தார் ஏகா லக்கானி.
சிறந்த ஒப்பனை – ‘விக்ரம் கெய்க்வாட்’ (பொன்னியின் செல்வன்-1)
வாசிப்பு அனுபவத்திற்கு சற்றும் குறையாமல் அவற்றின் கதைமாந்தர்களை திரையில் உலவவிடும் சவாலில் சாதித்தவர்கள் இந்திய அளவிலேயே மிகச்சிலர்தான். அதில் இந்தத் தலைமுறையின் நம்பிக்கை நட்சத்திரம் விக்ரம் கெய்க்வாட்.
சிறந்த கலை இயக்கம் – ‘தோட்டாதரணி’ (பொன்னியின் செல்வன்-1)
பழுவேட்டரையர்களின் நோக்கம் போலவே இருளடர்ந்த மாடமாளிகை, சோழர்களின் பிரதாபம் பேசும் போர்க்களங்கள் என பொன்னியின் செல்வனில் தன் தங்க முத்திரைகளைப் பதித்து வைத்திருந்தார் தோட்டா தரணி!
சிறந்த நடன இயக்கம் – ‘ஜானி’ (மேகம் கருக்காதா, திருச்சிற்றம்பலம்)
மங்கிய தெருவிளக்கின் கீழே நிலா சாட்சியாய் திருவும் ஷோபனாவும் கீபோர்டின் மெல்லின ரேகைகள் எழுப்பும் இசைக்குறிப்பிற்கு தங்கள் கால்களால் தாளமிட்டபோது மொத்த மாநிலமும் நெகிழ்ந்து ஹார்ட்டின்கள் விட்டது!
சிறந்த சண்டைப்பயிற்சி – ‘திலீப் சுப்பராயன்’ (வலிமை)
‘பைக் ஸ்டன்ட்கள் ஹாலிவுட்டுக்கானவை மட்டுமே’ என எழுதப்பட்டிருந்த நிரந்தர பட்டயத்தைக் கிழித்தெறிந்து பட்டையைக் கிளப்பினார் திலீப். இப்போது அதே பாதையில் விர்ரென ஆக்ஸலரேட்டர் முறுக்கி முன்னேறுகிறது தமிழ் சினிமா.
சிறந்த படத்தொகுப்பு – ‘பிரதீப் இ.ராகவ்’ (லவ் டுடே)
ஜம்ப் கட்டோ, ஸ்ப்ளிட் கட்டோ, எதுவாக இருந்தாலும் அதன் அடிநாதமாய் காமெடி இழையோடுவதை கவனமாய்ப் பார்த்துக்கொண்ட பிரதீப் ராகவின் கடமையுணர்ச்சி படம் முழுக்க ஒளிர்ந்துகொண்டே இருந்தது.
சிறந்த ஒளிப்பதிவு – ‘ரவி வர்மன்’ (பொன்னியின் செல்வன்-1)
திரையில் ஒரு பேரபனுவத்தைப் பரிசளித்த ரவி வர்மன், கோலிவுட்டைத் தன் வண்ணங்களால் வாழ்த்தும் வானவில்.
சிறந்த பின்னணிப் பாடகி – ‘மதுஸ்ரீ’ (மல்லிப்பூ, வெந்து தணிந்தது காடு)
மனித உணர்வுகளுக்கெனக் குரல் இருந்தால், அதில் ஏக்கத்தின் குரல் நிச்சயம் மதுஸ்ரீயினுடையதாகத்தான் இருக்கும். ‘மல்லிப்பூ’ பாடல் வழியே அவர் நிகழ்த்தியது இரு காதல் மனங்களுக்கு இடையேயான உரையாடல்!
சிறந்த பின்னணிப் பாடகர் – ‘ஏ.ஆர். ரஹ்மான்’ (மறக்குமா நெஞ்சம், வெந்து தணிந்தது காடு)
‘அடங்காத ராட்டினத்தில்’ என அவர் சாரீரம் உச்சம் தொடும்போது, புவி ஈர்ப்பு விதிகளை எல்லாம் ஏமாற்றி விண்ணில் பறந்தன லட்சோப லட்சம் மனங்கள்.
சிறந்த பாடலாசிரியர் – ‘விவேக்’ (அன்பரே, குளுகுளு / சண்ட வீரச்சி, கட்டா குஸ்தி)
கூடலின் இதம், இருத்தலின் யதார்த்தம், ஊடலின் அணைப்பு, பிரிவின் காயம், இரங்கலின் வலி என ஐந்திணைகளின் கூற்றை ஐந்தே நிமிடப் பாடல்வரிகளில் நமக்குக் கடத்திய அன்பர் விவேக்.
சிறந்த குழந்தை நட்சத்திரம் – ‘ஹியா தவே’ (நானே வருவேன்)
தொடக்கத்தில் நம்மைக் குழப்பத்தில் ஆழ்த்தி, போகப் போக மெதுவாய் பய கிராஃபை ஏற்றி இடைவேளைக் காட்சியில் அமானுஷ்யச் சிரிப்போடு அவர் கேமராவைப் பார்த்து வெறிக்கையில் முதுகுத்தண்டெல்லாம் சில்லிட்டது.
சிறந்த வசனம் – ‘தமிழரசன் பச்சமுத்து’ (நெஞ்சுக்கு நீதி)
ரீமேக் படங்கள் என்பவை அப்படியே அதை மொழிபெயர்ப்பதல்ல, அழுத்தமான வசனங்களின் மூலமாக அதை அடுத்தகட்டத்திற்கு உயர்த்திப்போக முடியும் என நிரூபித்துக்காட்டினார் தமிழரசன் பச்சமுத்து.
சிறந்த கதை – ‘தீபக், முத்துவேல்’ (விட்னஸ்)
மலக்குழி மரணங்கள் என்னும் அநீதி செய்திகளாய் மட்டுமே கடந்து கவனம் கலைத்த நிலையில், அதைக் கதையாய் மாற்றி, வலிமையான திரைப்படமாக உருவாக்கிப் பார்வையாளர்களை உலுக்கினார்கள் தீபக்கும் முத்துவேலும்.
சிறந்த திரைக்கதை – ‘ஹரிஹரன் ராஜு, கௌதம் ராமசந்திரன்’ (கார்கி)
கொஞ்சம் பிசகினாலும் அரசியல் தவறாய்ப் புரிந்துக்கொள்ளப்பட்டுவிடும் சாத்தியக்கூறுகள் உள்ள கதையைச் சொல்ல முனைந்த துணிவும், அது அனைவரையும் சென்று சேரும்படி லாகவமாகத் திரைக்கதை அமைத்த இவர்களின் சமூகப் பொறுப்புணர்வு பாராட்டுதலுக்குரியது.
சிறந்த குணச்சித்திர நடிகை – ‘கீதா கைலாசம்’ (நட்சத்திரம் நகர்கிறது)
படம் நெடுகத் தோன்றித்தான் பார்ப்பவர்களுக்குத் தாக்கத்தை உண்டாக்க வேண்டும் என்பதில்லை. சில நிமிடங்களேயானாலும் அதை ஆர்ப்பாட்டமாய்ச் செய்துவிட முடியும் என்பதை ‘நட்சத்திரம் நகர்கிறது’ வழியே மேடை போட்டுச் சொன்னார் கீதா கைலாசம்.
சிறந்த குணச்சித்திர நடிகர் – ‘காளி வெங்கட்’ (கார்கி)
சிறைக்கும் நீதிமன்றத்துக்குமாய் அல்லாடும்போது, கழிப்பறையில் சீனியரின் ஏச்சுகளை எதிர்கொண்டு நிற்கும்போது எனக் காட்சிக்குக் காட்சி நாம் கண்டு வளர்ந்த/கடந்துவந்த நடுத்தர வர்க்கத்து இளைஞரின் அத்தனை குணாதிசயங்களையும் பிரதிபலித்து அசரடித்தார்.
சிறந்த வில்லி – ‘ஐஸ்வர்யா ராய்’ (பொன்னியின் செல்வன்-1)
அழகும் அறிவும் ஒருசேரப் பெற்ற நந்தினிக்கு திரையில் ஐஸ்வர்யா ராயைத் தவிர வேறு யாரும் பொருந்தியிருக்க முடியாது!
சிறந்த வில்லன் – ‘லால்’ (டாணாக்காரன்)
அதிகாரத்திற்கென ஒரு நிரந்தர உருவம் கிடையாது. காலத்திற்கேற்றாற்போல அதன் கருவிகள் மாறிக்கொண்டே இருக்கும். திரையில் அதே அதிகார ஆணவத்திற்கென ஒரு முகம் கொடுத்தால் அதுதான் ‘டாணாக்காரர்’ ஈஸ்வரமூர்த்தி.
சிறந்த நகைச்சுவை நடிகர் – ‘யோகி பாபு’ (லவ் டுடே)
காமெடியோ, காதலோ, அரசியல் கருத்தோ, குணச்சித்திர வேடமோ… இயக்குநர்களின் கதை முன் நகர இன்றைய தேதியில் தேவை யோகிபாபு எனும் சாரதி!
சிறந்த அறிமுக இயக்குநர் – ‘தமிழ்’ (டாணாக்காரன்)
திமிரும் தோரணையுமான அந்தச் சீருடைக்குப் பின்னால் புழுங்கும் ரத்தமும் சதையுமான மனங்கள்மீதும், அவை எதிர்கொள்ளும் உளவியல் சிக்கல்கள்மீதும் வெளிச்சம் பாய்ச்சி, தமிழ் கொண்டுவந்தது தனித்துவமான கவன ஈர்ப்புத் தீர்மானம்!
சிறந்த அறிமுக நடிகை – ‘அதிதி ஷங்கர்’ (விருமன்)
‘தந்தையின் பெயருக்குக் கிடைத்த பரிசு அல்ல இது, தன் திறமைக்குக் கிடைத்த மரியாதை’ என விருமனில் காட்சிக்குக் காட்சி நிரூபித்திருந்தார் அதிதி!
சிறந்த அறிமுக நடிகர் – ‘கிஷன் தாஸ்’ (முதல் நீ முடிவும் நீ)
விட்டேத்தியான விடலைப் பருவம், பொறுப்பான பின்னிருபதுகள் என முதல் படத்திலேயே இரண்டு நேரெதிர் குணங்களைத் தூக்கிச் சுமக்க வேண்டிய வேலை. இரு துருவங்களுக்குமிடையே இருக்கும் தூரத்தைப் போல அதை அழகாய் வேறுபடுத்திக் காட்டினார்.