95வது ஆஸ்கர் விருதுக்கான இறுதிப் பரிந்துரை பட்டியல் இந்திய நேரப்படி மாலை 7 மணிக்கு வெளியாகிறது

உலக சினிமாவின் உயரிய விருதாகக் கருதப்படும் ஆஸ்கர் விருதானது சிறந்த படம், சிறந்த நடிகர், நடிகை, உள்ளிட்ட பல்வேறு பிரிவுகளில், திரைப்பட கலைஞர்களை தேர்வு செய்து விருது வழங்கி கவுரவிக்கப்படுகின்றனர். அந்த வகையில் 95-வது ஆஸ்கர் விருது வழங்கும் விழா வருகிற மார்ச் மாதம் 12-ம் தேதி அமெரிக்காவின் லாஸ் ஏஞ்சல்ஸ் நகரில் நடைபெற உள்ளது. இதனை முன்னிட்டு சிறந்த படம், சிறந்த நடிகர், சிறந்த நடிகை உள்ளிட்ட பிரிவுகளில் தேர்வுக்கு அனுப்பப்பட்ட படங்களை இறுதி செய்யும் பணி இறுதி கட்டத்தை எட்டியுள்ளது. அந்த வகையில் பல்வேறு பிரிவுகளில் இறுதிப் பரிந்துரை பட்டியலில் இடம் பெற்றுள்ள, படங்களின் பெயர்கள் அறிவிக்கப்பட்டுள்ளன.

இந்நிகழ்ச்சியானது மாலை 7 மணிக்கு ஒளிபரப்பாகிறது. இதனை அகாடெமி அமைப்பின் Oscar.com மற்றும் Oscars.org எனும் இணையதள பக்கங்களிலும், அகாடெமியின் யூடியூப் உள்ளிட்ட சமூக வலைதள கணக்குகளிலும் ஒளிபரப்பாகும் என அறிவிக்கப்பட்டுள்ளது. முந்தைய ஆண்டுகளை காட்டிலும் நடப்பாண்டிற்கான ஆஸ்கர் விருது இந்தியர்களுக்கு முக்கியத்துவம் வாய்ந்ததாக உள்ளது. முன்னெப்போதும் இல்லாத வகையில், நான்கு இந்திய திரைப்படங்கள் ஆஸ்கர் விருதுக்கான பரிந்துரைப் பட்டியலுக்கான இறுதிச் சுற்றுக்கு முன்னேறியுள்ளன.